மூன்றாம்பிறை

அன்பே...

2011-05-27T17:40:00.000+05:30

இரவையும் பகலையும் நிரந்திரமாய்

கிடைக்கப்பெற்ற உலகமிது,

பகலை இருட்டிப்பு செய்யவும்

இருளை வெளிச்சமாக்கவும்

துடிக்கும் மனித முயற்சிகள்..

மழலை என்பது அதிகாலை

முதுமை என்பது அந்தி,

மிகிந்து குறையும்

வளர்ந்து தேயும் உலக வாழ்வில்

நிரந்திரம் எதுவுமில்லை.

அன்பையும் பசியையும்

இழந்த மனிதன்தான்

பண்பையும் பரிவையும் மீறுகின்றான்

சுயம் சுற்றும் உலகில்

சுயம் பெற்றவன் மனிதனே!

மனிதனின் மகத்துவம் மறைக்கும்

மனித கொள்கையில் பிறந்த கடவுள்.

கண்டு கொள்ளமுடியாத அன்பில்

காணாமல் கிடைத்ததாம் பக்தி.

கடவுள் என்பது சுய நம்பிக்கைக்கு

வைக்கப்படும் ஓர் புள்ளியே!

கடந்தவன் தெய்வமாகிறான்

கடக்காதவன் தெய்வம் படைக்கின்றான்,

அறிவு என்பது ,

முன்னால் படைக்கப்பெறுவதில்லை

உன்னால் கிடைக்கப் பெறுவதே!

அன்பு என்பது,

படைத்து பெறுவதல்ல

கிடைத்து பெறுவதே!

கிடைக்காமல் பெற முயற்சிக்கும்

எண்ணம் கடவுள்..

கிடைத்தும் கொடுக்க மறுக்கும்

நிலை மனிதன்.

இருப்பதை கொடுக்க (அன்பு) மறுப்பதில்தான்

இல்லாததில் நம்பிக்கை (கடவுள்) பிறக்கின்றது.

உலகம் ஒன்றுபட,

அன்பை தேட முயலாதிர்கள்,

அன்பை கொடுக்க முயலுங்கள்.

அன்பிற் சிறந்த கடவுளுமில்லை

உன்னில் பிறக்காத அன்புமில்லை..

நீ ஒன்றே!

2011-05-23T23:15:00.000+05:30

நினைவுகளை திருத்தி பார்க்கின்றேன்

அதன் நிழல்கள் மாறவில்லை,

உலகமே உயிர் பெற்றிருந்தாலும்

அகம் தேடும் உயிர் நீயல்லவா!

கேள்விகளுக்காகவே காத்திருக்கும்

பதில்போல் உன்

அய்யங்களுக்காகவே என் மெய்

விழித்திருக்கின்றது.

அறிந்தவளின் அறியாமையில்

அறிந்து கொள்ளும் அதிசயங்கள் பல,

புரிந்தவளுக்கு புதிதாய்

எத்தனை வருடங்கள் பிறந்தாலும்

உன் அன்பின் இளமை படிக்க

வயதில்லையடி எனக்கு..

உலகம் ஒன்றல்ல..

உணர்வில் நீ ஒன்றே..

தமிழ் பூ

2011-04-14T18:14:00.000+05:30

சாய்ந்து சுற்றும் உலகினில்

நிமிர்ந்தெழும் நிதர்சனம் நீயடி,

பருவ மங்கையின் சிரிப்பாய், சிலிர்ப்பாய்

சப்தங்களையும் சந்தங்களையும்

பிணைத்து பிரசவிக்கும் தமிழ்த்தாய்!

ஒற்றை குழல் ஓசையாய்,

நாவிக் கமல நாதமாய்,

விண்ணதிரும் முரசுகளாய்,

உலகெங்கும் விரிந்தாய்

உணர்வெங்கும் பதிந்தாய்.

அழகை சொல்ல வந்த அழகே!

உன்னை பழகச் செய்ததென் பாக்கியமல்லவா!

இணை பிரியாமல் துணை புரியும் உன்

அணை பிரிய மறுதலிக்குமடி மனது.

எத்தனை மெல்லிய அன்புகளால்

என்னவளின் இதயம் திருட செய்தாய்,

அவளை கண்டு உன்னை உணர்ந்தேன்

உன்னை கொண்டு அவளிதயமடைந்தேன்..

மொழிகளுக்கெல்லாம் மேல் நின்று

வழி சொல்லும் உன் அகரமும் லகரமும்

சிகரம் தொட்டதென்றால் மிகையாகாது

என் தமிழே!

அனைவருக்கும் என் இனிய

தமிழ் புத்தாண்டு நல்வாழ்த்துக்கள்..

பெண்மையே!

2011-03-09T12:40:00.001+05:30

பெண்மையே!

உன்னை புரிந்து புரிந்து

பிரிகிறேன் பிரியமுடியாமல்,

உயிர் கொடுத்து உயிர் எடுக்கும்

உன் பிரம்மம் ஓர் சூத்திரமே..

அணையக் கிடைத்ததில் எல்லாம்

அடை காக்கவில்லை,

இணையக் கிடைத்ததில் விடை தராமல்

விடை பெரும் அம்புகளாய் எத்தனை கோடி..

உடலும் கடலென மூழ்கிய முத்துக்களில்

என்னை மட்டும் தத்தெடுக்கும் அன்னை சிற்பியே!

தன்னை அறியா தளிரும் உன்னை அறியும்..

என்னை அறிந்து புரியக் கிடைத்த பிரியம்

உலகில் நீயல்லவா பெண்மையே!..

அகயுகம்

2011-02-26T00:28:00.000+05:30

அகம் தர மறுத்த

ஞானம் எதுவுமில்லை,

யுகம் எங்கும் பிறர் பொருள்

தேடாதவரை.

உன்னில் மூழ்க

கிடைக்கும் முத்து

ஆழியிலும் கிடைத்திடாது..

அன்பை சொல்ல

ஞானம் தேவை இல்லை ..

ஞானத்தின் அன்பில்

அன்பை தவிர வேறெதுவுமில்லை.

இரு மெய் புணர் உலகில்

பொய்யென யாரும் பிறப்பதில்லை.

தன்னை சுற்றும்
உலகம் மாறவில்லை

உன்னை சுற்றும்
உலகில் உன்னில்
சற்றும் உணராதிருந்தால்..
என்ன சுற்றி பயன் அதற்கு..

யுகத்தின் பொருள் அகம்
அகத்தின் பொருள் யுகம்

யுகத்தில் நீயென
கிடைக்கப்பெறுவதை விட
யுகமே நீயனே உணர்ந்திடு
அகமே.......

அன்பில் மட்டும் அர்த்தமாகி..

2011-02-14T23:55:00.004+05:30

உன்னை விழிக்க செய்து
உறங்கி போகும் நினைவுகள்..

காலத்தின் கணிசமான
இழப்புகளையும் ஈடு செய்ய
துடிக்கும் அலைபேசி பரிமாற்றங்கள்..

நிஜங்களில் திளைந்து
நினைவுகளை சுமந்து
கனவுகளை கரை சேர்க்க
துடிக்கும் இந்த புனித பயணம்.

வாழ்வின் மாற்றங்களில்
மாற்றம் தராத உன் நேசம்..

துடித்து செல்லும் காலத்திலும்
அடித்து செல்லாத உன் அன்பு..

அடுத்து சொல்ல வார்த்தை இல்லை
அன்பில் மட்டும் அர்த்தமாகி போகிறேன்..

உலகத்தில் நீ

2011-02-05T22:46:00.004+05:30

இன்னமும் எண்ணமுடியாத நட்சத்திரங்களின் முன்
எண்ண முடியும்

எண்ணமற்ற மனிதர்களாய் நாம்..

மனம் கொல்லும் மனிதன்தான்
மனிதர்களை கொல்ல முடியும்.

தினம் படைத்த பூமியும்
கணம் மாறவில்லை,

மனம் கிடைத்த மனிதனே!
கணமெல்லாம் ரணம் செய்து
யுகம் வளர்த்திடும் உன்
முகமும் அகமும் மறையும்.....
நிழல் இரவு, பகல் உறவு
எனும் உலக சுற்றில்....

கரு-உரு

2011-01-07T13:23:00.001+05:30

உரு பார்த்து கரு

தொலைத்தேன்..

கரு பார்த்து கரு

வளர்த்தேன்..

கருவின் உருவத்தில்

உருவில் கரு இல்லை

உருவின் தோற்றத்தில்

கருவின் கரு இல்லை.

கருவின் கண்ணே!

உருவானபின்,

புறக்கண்ணும் அறியுமோ!

அகக்கருவை..?!!

கருவில் உரு இல்லை
உருவில் கருவே எல்லை...

புத்தாண்டு வாழ்த்துக்கள்...

2011-01-03T13:16:00.001+05:30

இன்றும் புதிதாய்
பிறந்து கொண்டிருக்கும்
இவ்வுலகை புரிந்துகொள்ள
உன் உள்ளத்தினை
புதுப்பித்துக்கொள்,

உலகம் பெரியது அதன்
உள்ளம் சிறியது.

உள்ளம் திறந்தால்
உலகமும் ஓர் நாள்
சிறிதாக காணும்
அன்பெனும் கடலில்
சிறு தீவாய்....

அனைவருக்கும் என் இனிய
புத்தாண்டு வாழ்த்துக்கள்...

தமிழ் புத்தாண்டு நல்வாழ்த்துக்கள்..

2010-04-14T10:13:00.002+05:30

அகரத்தை

ஆதியில்

இணைத்து

ஈன்றது

உந்தன்

ஊடகம்,

எங்களின்

ஏற்றமாய்..

ஐந்தினையும்

ஒன்றுபட்டு

ஓங்கிடும்

ஔவியம் கொள்ளாத

அஃகம் நீயல்லவா..

எங்கள் தமிழே...

அனைவருக்கும்

என் இனிய

தமிழ் புத்தாண்டு நல்வாழ்த்துக்கள்..

பெண்கள் தினம்.

2010-03-08T10:52:00.000+05:30

இறப்பெனும் நிலை சென்று
பிறப்பினை கொடுக்கும்
பெண்மையே!
உன் நினைவுகள் என்றும்
இறப்பதில்லை இவ்வுலகினில்...

வலை உலக சகோதரிகளுக்கும்
தோழிகளுக்கும் என் இனிய பெண்கள் தின
வாழ்த்துக்கள்..

காகிதங்களின் கைகளில்...

2010-02-06T23:59:00.002+05:30

இன்னமும் கரைந்து கொண்டிருக்கின்றேன்
கணங்களைப்போல்,
கடமையின் கால் விலங்கு அறுந்து
நடை பழகும் குழந்தையாய் நான்.
வருடங்கள் மட்டும் இலையுதிர் காலமென
என் இளமை உதிர்த்து செல்கிறது.
துணை தேட விழைந்த பயணம்
தூசி தட்டி திறக்கும் ஜாதக பக்கங்கள்.
பன்னிரு கட்டங்களில் மட்டுமே
பயணிக்கும் மண வாழ்க்கை.
பிறந்த கணங்களிலேயே அன்பை உணர்ந்தும்
பகிர கிடைக்காத நிலை.
அவளால் மட்டுமே உணரக்கூடிய அன்பு
அச்சு பதிக்கும் காகிதங்களின் கைகளில்...
.
.
.

மருத்துவன்

2010-01-20T10:06:00.001+05:30

இப்படியும் அப்படியும்
ஆட்டுவிக்கிறான்
எப்படிப்பட்ட மனிதர்களையும்,

கத்திமுன் பணியவைக்கிறான்
புத்திகொண்ட புருஷர்களையும்.
எப்பவாது காயப்படுத்தியும்
விடுகிறான்.

இத்தனையும் செய்துவிட்டு
ரசம் சூழ்ந்த கண்ணாடி முன்
நம்மை ஒப்பனை கவிதையும்
ஆக்கிவிடுகிறான் அரையடி
கத்திகொண்டு..

(நன்றி பா.ரா )

தைத்திருநாள்

2010-01-13T16:13:00.000+05:30

போகி

செந்தூரமிட்டது அந்தி வானம்,
தாவாரம் தொட்டது ஆவாரப்பூக்கள்.
தேவாரம் பாடியது மங்கள இசை
ஆராவாரமிட்ட சிறு பெண்டிர்,
ரீங்காரமிட்டது மாலை வண்டுகள்.
மூவடிகம்பினில் தீமூட்டி சுவைத்த
முக்கண் சூரண தேங்காய்,
பழையன பற்றி எரிந்தது போகியில்
புதிய ஜோதியாய்..

'தை'த்திருநாள்

வானத் தை வளைக்கும் வானவில்
நாணத் தை விளைக்கும் பூவைகள்
கானத் தை இசைத்திடும் பாடல்கள்
புருவத் தை உயர்த்திடும் வீர விளையாட்டுக்கள்
பருவத் தை அடைந்திடும் விடலைப் பெண்கள்
கோலத் தை ஏற்றிடும் புதிய வாசல்
காலத் தை வென்றிடும்
இத் தை திருநாள்..

மாட்டுப்பொங்கல்

"சேற்றிலே" உன் கால் வைக்கும் முன்
தன் கால் வைத்து உழைத்த காளைக்கும்
"வீட்டிலே" தாய்ப்பால் சுரக்கும் முன்
தன் பால் தந்து காத்திடும் பசுவிற்கும்
நன்றிகள் ஆயிரம் சொல்வோம்
மாட்டுப் பொங்கல் திருநாளிலே..

காணும்பொங்கல்

உழவுக்கு வந்தனமிட்டோம்
உறவுக்கு சந்தனமிட்டோம்
பசுவுக்கு படையலிட்டோம்
பாசத்தின் உணர்விலிட்டோம்.

ஊரெல்லாம் பொங்கலிட்டது
உணர்வெல்லாம் பொங்கிவிட்டது
உழைத்திட்ட உள்ளங்களே!
களைத்திட்ட சோர்வுநீங்க
ஊரெல்லாம் கூடிடுவோம்
உளமார பாடிடுவோம்
இக்'காணும்' பொங்கலிலே...

அனைவருக்கும் இனிய 'தை' திருநாள்
பொங்கல் நல்வாழ்த்துக்கள் நண்பர்களே..

ஒரு பிடி காற்றுக் கோளம்

2010-01-06T23:04:00.004+05:30

ஆரோகணமும் அவரோகணமும்
புணர்ந்துகொண்டிருந்தது,
ஆழியொத்த தாழி ஒன்றில்,
கத்திப்புற்கள் கண்ணீர் நிரப்ப
சபிக்கப்பட்டிருந்தது..

அரவமொத்த பாத தீண்டல்கள்
சாகா வரம்பெற்று உருண்டுகொண்டிருந்தது
பூகோள பந்தொன்று..

ஆயிரம் சூரிய பார்வை ஒற்றை வட்டத்திற்குள்
எட்டுத்திக்கும் நிழல் விம்மம்..

பச்சை பாய் கிடத்தி காலனிட்ட
உந்துதலில் ஓலமிட்டும் மரிக்கக் கடவாத
ஒரு பிடி காற்றுக் கோளம்...

(நன்றி நேசமித்திரன்)

நகல்

2010-01-01T00:25:00.000+05:30

ஒரு போக்குவரத்து சாலை நிறுத்தத்தில்
நம் வலையுலக ஜாம்பவான்களின் வரிகள்
எப்படி இருக்குமென்று ஒரு சிறு கற்பனை..

நேசமித்திரன்

மேகம் புணர்ந்த துளிகளில் அழுக்ககற்றி குளித்தது
சேன்றோவின் வைபர் கைகள்,
மரித்துக்கொண்டிருந்த சிகப்பு வினாடிகளில்
கசிந்துகொண்டிருந்தது சைலன்சர் சுருட்டு.

மெர்சிடிசின் யன்னலில் நிழல் முகம்
ஒப்பனை செய்துகொண்டிருந்தது
சாலை கடந்த கிளையொன்று.
தரை புணர்ந்த தடம் விட்டுசென்றது
தண்ணீர் வாகனம் பச்சை ஒளி கடந்து...

பா.ரா

நின்ற வாகனத்தில் விழித்தெழுந்தான் பிஞ்சுக்கரம் பட்டு,
கைக்குழந்தையுடன் நின்றுகொண்டிருந்தாள் பெண்ணொருத்தி,
மாமாவ புடிச்சுக்கோ என்றாள் மூன்று வயது மகனிடம்,

பலூனுக்கு விழைந்து அழுதவனை அதட்டினாள்
உங்கப்பன் சரியா இருந்தா நமேக்கேன்டா
இந்த நிலைமையென்று குரல் தழுத்தாள்..

எங்கோ தப்புணர்ந்தவன் வேகமாய் இறங்கி
வாங்கி வந்தான் கைநிறைய பலூன்களுடன்
அழுத குழந்தையின் கைகளில் ஒன்றை திணித்து..

சிறு சிறு ஊதல்களில் பெரிதாகும் பலூனைப்போல்
சிறு சிறு ஊடல்களில் பெரிதாகும் பந்தம்
உணர்ந்தவனாய் விட்டுவந்த மனைவியையும்
குழந்தைகளையும் எண்ணி பேருந்து நிற்கும்முன்
இறங்கிகொண்டிருந்தது அவன்மனம்
அடுத்த நிறுத்தத்தில்....

(நேசமித்ரா, பா.ரா பிழையிருந்தால் மன்னியுங்கள்
உங்கள் நிழலாய் நானும் வரைந்து
வடித்து பார்க்கின்றேன் அவ்வளவே)

அனைவருக்கும் ஆங்கில புத்தாண்டு வாழ்த்துக்கள்..

சிந்தனை துளிகள்..3

2009-12-25T08:21:00.002+05:30

நேற்றைய அனுபவம்,
இன்றைய சிந்தனை!
இன்றைய சிந்தனை,
நாளைய வழிகாட்டி!
நாளைய வழிகாட்டி,
இன்றைய தத்துவம்..

தெய்வ நம்பிக்கை என்பது
உன் உடலில் இருக்கும்
குருதி போன்றது,
ஒவ்வொரு துளி சிந்தும்பொழுதும்
உன் இறை நம்பிக்கையை
நினைவுபடுத்திக் கொள்கிறாய்.

நீ கடந்து சென்ற பாதையில்தான்
நீ மறந்து சென்ற வழிகள் இருக்கும்
நீ மறந்து சென்ற வழிகளில்தான்
நீ கடந்துவிட்ட வாழ்வு இருக்கும்..

மண்ணில் இருக்கும்
இரும்பு துகள்களுக்குகூட ஒரு
காந்தபுலன் கிடைத்துவிட்டால்
எழுந்துவிடுகிறது,
நீயும் உன் திறமைகளுக்கான
புலனில் எழாவிட்டால்...
உன் திறமைகளும் மண்ணில்
மறைந்த துகள்களே..!

சகவாச சேறு

2009-12-12T09:33:00.001+05:30

நத்தையிட்ட ஈரம்போல்
நகர்ந்துகொண்டிருந்த பின்னிரவு,

அரவமற்ற அறையினில்
அழுதுகொண்டே தீர்ந்துகொண்டிருந்த
மெழுகுவர்த்தியாய் அவள்..

மது நீர்த்து மாது தீர்த்திட
கூலி கொடுக்கிறது மாமிச பட்சி,
பட்சியாய் நுழைந்ததெல்லாம்
பச்சையாய்.....!

வீணையவள் மீட்டப்படுகிறாள்
ஈன ஸ்வரங்களாய்..
மீட்கப்பட முடியாமல்...
தந்தியறுத்து தந்தியறுத்து
பிணைக்கப்படுகிறாள் மீண்டும்
பந்தி படைக்க..

என்றோ பூக்களைகூட பாரமென
வீசியவள் தலைக்கனம்
சகவாச சேற்றினில் விழுந்து
புரளமுடியாமல் புலம்புகிறது..

நாதியறுத்து வந்தவளின்
நாடியறுக்கும் உலகினில்..

ஓரடிக்கயிறு

2009-12-04T11:35:00.007+05:30

மாலையின் முற்பொழுதொன்று,
ஆயிரமாயிரம் சுக துக்க சமிக்கைகளை
தாங்கி நின்ற தந்தி கம்பமொன்றில்
பசுவும் இளம் கன்றும் ஒன்றாக
பிணைக்கப்பட்டிருந்தது ஓரடி கயிற்றினில்..

பசியுற்ற கன்று பசுவின் மடி தேட எத்தனித்தது,
கயிற்றின் கருணைக்குறைவால் கழுத்தழுந்தியது.
கன்றுணர்ந்த பசுவும் மடி கொடுக்க முயன்று முயன்று
தோற்றது பிடி கொடுக்காத கயிற்றின் முனையில்..

தந்திக்கம்பத்துக்கும்  பசுவுக்கும் இடையில்
கயிறு வீணையிட்ட தந்தியாய் துடித்தது,
எங்கோ அழு குரல் கேட்டு விழிக்கின்றான்
உண்டு களைத்த கறவைக்காரன்..

கறக்க வந்தவன் கட்டவிழ்க்கின்றான்
கன்றுக்கு கண நேர அனுமதியுடன்..
கயிற்றில் புண்பட்ட பசு கன்றின் மெய்பட்டு
சிலிர்த்து முத்தமிட்டது மொத்த ரணம் தீர்ந்ததாய்..
முட்டிக்குடித்த கன்று பிரிக்கப்பட்டது
கருணையின் நேரம் தீர்ந்ததாய்..

இனி மடியின் குருதி வரை
கறக்கவிழைபவனை பார்க்கின்றது,
நிசியில் வன்புணரும் கடைசிக்காமுகனுக்கு
பொறுத்துக்கொண்டு கை இறுக்கும் தாசியைப்போல்...

(இது உரையாடல் சமுக கலை இலக்கிய அமைப்பு
நடத்தும் கவிதை போட்டிக்காக எழுதப்பட்டது.)

பசி

2009-11-26T22:50:00.000+05:30

மாரில் தங்கமறுத்த பாலுக்கு
விழைந்து வீறிட்ட குழந்தையை
இடுப்பில் தக்க வைத்து
இறைஞ்சுகிறாள்...
இரக்கமற்றவனின் வாகன யன்னலும்
இறங்க மறுக்கின்றது..
சிவப்பு விளக்கு நிறுத்தத்தில்
பச்சிளம் தளிரின் பசி நிறுத்தமுடியாமல்..

யாசித்தவனுக்கு
யோசித்து சட்டைப்பை தடவி
தொட்டு விழுந்த ஒற்றை காசில்
திறந்தது பசியடைத்த செவிகள்..

விருந்தொன்றில்
பசியற்றவன் புசித்த மிச்சம்
நிரப்புகின்றது குப்பைத்தொட்டியின்
வயிற்றினை..

யாக்கையின்
முதல் வேட்கை
தணிய துணிந்த
பிச்சையாய்...

கண்ணாடி முன்

2009-11-20T07:36:00.001+05:30

கண்ணாடி முன்
கவிதையாய்
நான்..
கவிதையின்
அர்த்தமாய்
என்றும் நீ..

இதயத்தில்
உன்னை
தேடினேன்...
என்னை
தொலைத்துவிட்டு..

பெரிதான
அன்பின் முன்
சிறிதாகிபோன
உயிர்...
சிறிதான
உயிரிலும்
பெரிதாக
கலந்தது
உன் அன்பு..

நீயும்
நானும்
பற்றிக்கொள்ள
பற்றிக்கொண்டது
காதல்
நெருப்பு..

சிந்தனை துளிகள்

2009-11-14T07:46:00.001+05:30

மௌனம் சம்மதத்திற்கு பொருந்தும்
சங்கடங்களுக்கு பொருந்தாது
சங்கடத்தின் மௌனம் உன்னை
சப்தமாக கொன்றுவிடும்.

தியாகத்தில் திரியாய்
தீபத்தின் ஒளியாய் நீ
பிரகாசித்தாலும் நம்பிக்கை எனும்
எண்ணை இல்லாவிடில் உன்னால்
நிரந்திரமாய் பிரகாசிக்க முடியாது.

ஒரு பொய்க்கு உண்மையான
காரணம் இருக்கும்,
ஒரு உண்மைக்கு பொய்யான
காரணம் இருக்கமுடியாது.

காலம் கடந்த ஞானம்
முற்றுபெறுவதில்லை
காலங்களை கடந்த ஞானம்
விட்டுப்பிரிவதில்லை.

உலகை வெளிச்சமாக்கிய சூரியனால்
உன்னை வெளிச்சமாக்க முடியாது
உன்னில் நீ பிரகாசித்துவிட்டால்
உன்னாலும் இவ்வுலகை
பிரகாசிக்க வைக்க முடியும்.

அன்பை எடுப்பவன் ஆயுதத்தைவிட
கூர்மையானவன்,
ஆயுதத்தை எடுப்பவன் அன்பினால்
கூர்மையாக்கப்படாதவன்.

தொடர்பதிவு

2009-11-10T00:08:00.005+05:30

அன்பு நண்பர் விஜய்க்காக....

1.A- Available/single - single but not reachable
                                      searching for a kind...

2.B- Best Friend - நிறைய நண்பர்கள் பட்டியலிட்டு
                               பார்க்கவேண்டுமா?

3 C - Cake or pie - இரண்டுமில்லை

4 D - Drink of choice - காபி (bru

5 E - Essential items you use everyday - My bike Suzuki Access125

6 F - Favorite Colour - ரோஸ்

7 G - Gummy bears or worms - இரண்டும் இல்லை

8 H - Hometown - கரூர்

9 I - Indulgence - வலைத்தளம்

10 J - January or February - போகி,

11 K - Kids and their names - இன்னும் மணமாகவில்லை

12 L - Life is incomplete without - ரசனை

13 M - Marriage date - சொல்லப்படாத கவிதை

14 N - Number of siblings - 1 அக்கா உஷா

15 O - Oranges / Apples - ஆப்பிள்

16 P - Phobias / Fears - இயற்கை அழிவுகள்

17 Q - Quotes for today - silence is the sound of soul
                                           violence is the mute of soul

18 R - Reason to smile - மழலைகள்

19 S - Season - குளிர்காலம்

20 T - Tag 4 people - எல்லோரும் ஒரு ரவுண்டு வந்துட்டாங்க.

21 U - Unknown fact about me - மூன்று வருடங்களுக்கு முன் மூன்றாம்பிறை கவிதை தொகுப்பு வெளியிட்டது.

22 V - Vegitable you dont like - அப்படி எதுவும் இல்லை.

23 W - Worst habbit - வெளுத்ததெல்லாம் பால்

24 X - Xrays you had - வலது கையில்

25 Y - Your favorite food - இட்லி பூண்டு சட்னி (காரமா)

26 Z - Zodiac sign - மீனம்

அன்பிற்குரியவர்கள் - அனைத்து நட்பும்

ஆசைக்குரியவர்கள் - எதிர்பார்ப்பின் விளிம்பில்

இலவசமாய் கிடைப்பது - மழை, மழலை மொழிகள்.

ஈதலில் சிறந்தது - அன்பான பசியாற்றல்

உலகத்தில் பயப்படுவது - உலக வெப்பமடைதல்

ஊமை கண்ட கனவு - சொல்ல தெரியவில்லை.

எப்போதும் உடன் இருப்பது - Nokia 6021

ஏன் இந்த பதிவு - நட்புக்காக

ஐ - ஐஸ்வர்யத்தில் சிறந்தது - தக்க சமயத்தில் உதவுவது

ஒரு ரகசியம் - அன்பைவிட கூர்மையான ஆயுதம் இல்லை

ஓசையில் பிடித்தது - புல்லாங்குழல்

ஔவை மொழி ஒன்று - ஆறுவது சினம்

நன்றிகள் பல என் வலை நண்பர்களுக்கு...

ஆனந்த நேசம்

2009-10-29T09:30:00.005+05:30

இளையராஜாவின்
இசையில் சங்கீதமேகம் தேன் சிந்தும் நேரம்...
பாடல் எல்லோரும் கேட்டிருப்பீர்கள்.
அதில் சில வரிகள் மாற்றி ஓர் பாடல்.

ஆனந்த நேசம் உன் வாழ்வில் வீசும்
பொன்மாலை தீபம் சூடும் நேரம்..
ராகம் ஒரு தீபமே! என்னில் ஒளி வீசுமே!
வீசும் ஒளி யாவும் என் பாசமே!

ஆனந்த நேசம்.....

காணும் கனவுகள் கண்ணிலே
காலம் வரைந்திடும் உன்னிலே
வீணை மொழிதனில் வானை அழைத்திட
நீ...ஓடி வா...
எந்தன் ஏட்டில் வந்த பாட்டில்
இசையாய் ஒலித்தேன்,
எந்தன் ஏட்டில் வந்த பாட்டில்
இசையாய் ஒலித்தேன்
பாடல் ஓர் தேடலே...

ஆனந்த நேசம்...

அன்பு என்னும் கீதமே!
ஆள பிறந்திடும் நாதமே!
உள்ள விழிகளில்
வெள்ளம் பெருகிடும் ஓர் ஜீவனே!
உன்னை தீட்டும் எந்த பாட்டும்
உறங்கா உறவே!
உன்னை தீட்டும் எந்த பாட்டும்
உறங்கா உறவே!
பாடல் ஓர் தேடலே....

ஆனந்த நேசம் உன் வாழ்வில் வீசும்,
பொன்மாலை தீபம் சூடும் நேரம்..
ராகம் ஒரு தீபமே! என்னில் ஒளி வீசுமே!
வீசும் ஒளி யாவும் என் பாசமே!

(குறை இருந்தால் மன்னிக்கவும்)
நன்றி.

மருந்து

2009-10-27T09:31:00.004+05:30

தாழப்பறந்த

பருந்தினை

சினந்து

விரட்டியது

சேவல்

பெட்டைகுஞ்சுகளுடன்..

தவழக்கிடந்த

குழந்தையின் முன்

மருந்து

வேண்டி

கர்பிணியை

உதைத்த

கணவன்..

மருந்தின் முன்

பருந்தாகிபோனவனாய்..

சில சிந்தனைகள்

2009-10-24T09:26:00.002+05:30

எல்லோரும் உன்னைப்போல்

இருக்கவேண்டும் என நீ நினைத்தால்

உன் அறிவுதான் இந்த

உலகத்தின் அறிவாக இருக்கும்..

உன்னை கடந்துவிட்ட துன்பங்களுக்கும்

உன்னால் நடந்துவிட்ட துன்பங்களுக்கும்

இடையே உள்ள வேறுபாட்டில்தான்

உன் வாழ்வின் இன்பக் கணக்கு எழுதப்படுகிறது..

சப்தங்களை நிறுத்தாதவரை

உன்னால் அமைதியை உணரமுடியாது,

எண்ணங்களை நிறுத்தாதவரை

உன்னால் தெளிவாக சிந்திக்கமுடியாது..

அறிவுக்கும் மனசுக்கும் சிக்கல்

இருக்கும்போது நீ மனசு சொல்வதை

மட்டும் கேள்! அறிவை கேட்காதே!

அறிவுக்கு அனைத்தையும் தெரியும்

மனசுக்கு உன்னை மட்டுமே தெரியும்.

நீ புரிந்துகொண்ட விசயங்களை

தெரிந்து கொள்ள நினைக்காதே!

நீ தெரிந்து கொண்ட விசயங்களை

புரிந்து கொள்ளாமல் இருக்காதே!

நல்லதை அறிந்துகொள்!

தீயதை தெரிந்துகொள்!

மனமே

2009-10-20T08:30:00.003+05:30

மனமே!

எப்படி இருக்கின்றாய் நீ?

பேதையின் கூட்டிலும் இருக்கின்றாய்,

பேரறிவாளன் கூட்டிலும் இருக்கின்றாய்.

பறிக்கவும் கொடுக்கவும்

இரு கைகள் போதவில்லை என

ஆயிரம் கரங்கள் கேட்கிறாய்!

அழகினை ஆராதிக்க

இரு விழிகள் போதவில்லை என

ஆயிரம் விழிகள் கேட்கிறாய்!

நிறைகின்றாய் குறைகின்றாய்

நிலவைப்போல் நியதியில்லாமல்..

நினைகின்றாய் நனைகின்றாய்

நித்தமோர் நிமித்தமாய்..

உடற்சிறைபட்ட மனமே!

உணர்ச்சி பெருக்கால்

உள்ளச்சிறையும் படுகிறாய்.

அவய துடிப்புகள் எல்லாம்

சமய துடிப்புகள்வரைதான்,

வார்த்தை ரணங்கள்

கணங்கள் கடந்தாலும்

மனங்கள் கடப்பதில்லை..

இறந்து இறந்து

பிறந்து வாழ்கிறாய்

மறந்துவிட மனமில்லாத மனமே!

புத்தி உறங்கி விழிக்கிறது

மனம் உறக்கத்திலும் விழிக்கிறது

கனவு விழி திறந்து..

சிதைக்குள்

சிறைப்பட்டு சிறைபட்டே

வதைபட்டு கொண்டிருக்கின்றாய்

உணர்வுகளின் பிடியில்

நிராயுதபாணியாய்...

மனமுவந்து பார்த்தால்

மனம் ஓர் குழந்தையே..

கனவு(கள்)

2009-10-16T08:03:00.002+05:30

விளக்கொளியும் பிறையென

சிறுத்த இரவு..

சிணுங்கி சிணுங்கி

மறுதலித்தாள்,

மருதவிப்போடு..

குளிரின் படிமம்

தளிரில் படிந்திடாது

விரட்டிய வேட்கையின்

வெம்மமூச்சு..

நினைந்து நினைந்து

இணைந்த கணங்களில்

கலைந்து வெடித்த

கனவு(கள்)...

கலைந்த கரு

2009-10-14T10:00:00.003+05:30

போக்குவரத்து நிறுத்தம்..

தலைப்பு செய்தி:

குழந்தை தொழிலாளர்கள் தடை

சட்டம் நாடு முழுவதும்

நடைமுறை படுத்தப்பட்டு இருக்கின்றது

மத்திய மந்திரி பேட்டி

....கூவி .... கூவி செய்தித்தாள்

விற்றுக்கொண்டிருந்தான்

எட்டு வயது சிறுவன்.

கருக்கலைப்பு சட்டம்

அமலாக்கப்பட்டு ஐம்பது வருடங்கள்

நிறைவு விழா..

உணவு இடைவேளையில்

கலைக்கப்பட்டு பரிமாறப்பட்ட

இரட்டை கரு முட்டைகள்..

கலைக்கப்பட்ட கருவைபோல்

கலைந்துவிட்ட பள்ளிக்கனவுகள்..

தேவதையின் வரம்!

2009-10-11T09:53:00.004+05:30

ஈழத்தின்
ஈனங்கள்..

ராவணன் எல்லாம்
ராணுவனாய்.. தேசத்து
சீதைகளுக்கெல்லாம்
சிதையிட்ட கேவலம்
மரித்த நாயினும் கேடாய்..
புத்த பூமியில்
மொத்த அவலமாய்..

இலங்கமும்
கலிங்கமாய்
கலங்கியதேன் ஒண்டும்
விளங்கல்ல..

ஈழத்தின்
ஈன குரல்களுக்கு செவி
சாய்க்காமல்
சாய்ந்துவிட்ட அந்தியே!
மீண்டும்
முகடேறி
முறை செய்ய வந்ததேன்?
இழவு நாட்டில்
எத்தனை சிதைகள் என்று
உளவு பார்க்க வந்தாயா?
விடியல் என்ற போர்வையில்
விடியாத பூமிக்கு..

உலகெல்லாம் என் பந்தம்
என் தேசத்தில் மட்டும்
ஏன் தீப்பந்தம்?
சமூகம் எமக்களித்த
போர்பந்தமா?

இனமெல்லாம் தனலிட்டபின்
மணலிட்ட உரம்தானே! இனி
வரமிட்டு வாழ்வது யாரிங்கே?
வரமென்று வேண்டாம்
கரமொன்று நீட்டுங்கள்
கையாலாகாத பூமியில்
கையளவாது ஈரம் மிஞ்சட்டும்...

ஊக்கமும்
ஆக்கமும்
ப.ரா , ஹேமா

ஒளி

2009-10-09T09:16:00.006+05:30

கிழக்கு முகத்திற்கு

சிகப்பு செந்தூரமிட்டவிடியல்

முகப்பு வெளிச்சம்

முற்றம் வந்தது,

மாற்றம் இல்லா விடியலை ஏற்று

மாசு இல்லா மனதால் விழித்திடு...

அக்னி பந்தொன்று கண்டேன்

மெல்லினமாய் புன்னகைத்தது

இளங்காலை விடிந்ததென்று..

வல்லின ராகம் மீட்டிடும் வேளைக்கு

வெயிலோன் வரும்முன்

துயிலை விழித்திடு மயிலே!

உலகினை படம் பிடித்த கதிரொளி

உணர்வுகளையும் படம் பிடித்து சென்றது

அந்தியில்...

பொன்னிற ஒளி சிந்தும் மாலைபொழுது

ஆய கலைகளில் சிற்பத்தையும் ஓவியத்தையும்

இணைத்தாற்போல் மேற்கு மேகம் காவியமாய்..

மஞ்சளிட்ட அந்தியே!

நான் அஞ்சலிட்ட சேதி

கண்டுவிட்ட காரணமோ!

நின் வண்ணம் நாணம் பூண்டு

செவ்வண்ணம் ஆகியதே!!

மூன்றாம்பிறை

2009-10-03T00:02:00.001+05:30

நிலவு சொல்லும் வாழ்வினை என்

நினைவு சொல்லும் கவிதையாய் எழுதுகிறேன்!

ஆயிரம் நட்சத்திர பந்தங்களுடன்

ஓர் ஒளிக் கீற்றாய் பிறந்தேன்!

பிறையென பிறந்தேன்! மதங்களில்

நிறையென வளர்ந்தேன்!

புவியின் நிழலில் என்

நிஜங்களின் வளர்ச்சி கண்டேன்!

நாளொரு மேனியும் பொழுதொரு

வண்ணமாய் வளர்ந்தேன்.

புவியுலகில் நான் பெண்ணாய்

சித்தரிக்கப்பட்டேன்!

ஆயிரம் கவிதைகள் பிறந்தன,

ஆயிரம் மொழிகளில் பிறந்தன.

அன்று பௌர்ணமி - என்

வளர்ச்சியிலும் வாழ்விலும்

முழுமையடைகின்றேன்!

பெண்மையாய் பிறந்தேன்!

எனக்குள் ஓர் கர்வம்

இன்னுமொரு சூரியன் என!

அன்று நாணத்துடன் முழுமையாய்

எழுந்தேன்!

என் இளமையின் வாழ்க்கை

அன்று மட்டும்தான்!

நான் கண்ட காட்சிகளின் விசாலம்

பிறப்பின் பயனை அன்றுதான் அடைந்தேன்.

ஆர்பரிக்காத கடல்

வெண்மேக கூட்டங்கள்

வெள்ளிப் பனி மலைகள்

வானுயர்ந்த மரங்கள், மலைகள்

முகடுகள் எனப் புவியின் எழில் அனைத்தும் ரசித்தேன்!

ஆயிரம் மழலைகளுக்கு அன்னை

அமுதூட்டினாள் என் எழில் காட்டி,

எத்தனை கவிதையும் ஈடு செய்ய முடியாத

அந்த மழலை மொழிகள்..

இப்புவியில் நான் கண்ட

துயரங்கள் சிலவால் என் முகப்பொழிவிழந்தேன்!

இதற்கு நிலவு களங்கம் என பெயர் சூடினர்.

பெண்மையாய் பிறந்தேன்!

மழலை விழி பார்த்து

தாய்மையுடன் அந்தி மறைந்தேன்!

வீழும்போது என் இளமை தேய்வதை உணர்ந்தேன்!

பிறையாய் பிறந்து நான் கண்டதை,

பெற்றதை தேய்பிறையாய் இழந்து வந்தேன்!

இங்கு கீதையின் கூற்றை நினைவு கூர்கிறேன்!

இளமையின் பார்வையில் வந்ததை

முதுமையின் கோலத்திலும் காண்கிறேன்!

இங்கு நான் எடுத்து செல்லவுமில்லை

விட்டு செல்லவுமில்லை.

எங்கு பிறந்தேனோ! அங்கு

செல்வதை உணர்ந்தேன்!

தேய்ந்து தேய்ந்து

மீண்டும் கடைசி ஒளிக்கீற்றாய்

மூன்றாம் பிறை நிலை அடைந்தேன்!

அன்று விழும்போது மரணத்தின் வாசல் கண்டேன்.

அன்று அமாவாசை!

என் மரணம் கண்டு

கடல்கள் ஆர்பரித்தன!

ஆயிரம் நட்சத்திர பந்தங்களோடு

பிறந்த என் இழப்பை ஈடு செய்ய

முடியாமல் கோடி நட்சத்திரங்கள்

விழி பூத்து என்னை தேடின..

என் மரணம் ஓர் முடிவல்ல

மீண்டும் பிறையென பிறப்பேன்!

வாழ்வில் நிறையென சேர்ப்பேன்!

என் வாழ்வே மனித வாழ்வின் தத்துவம்..

ஜனனம்..

2009-09-30T23:25:00.006+05:30

முகிலின் மரணம்
மழையின் ஜனனம்,

விதையின் மரணம்
துளிரின் ஜனனம்,

பூக்களின் மரணம்
வாசனையின் ஜனனம்,

ஞாயிறின் மரணம்

திங்களின் ஜனனம்.

இயற்கையின் எல்லா மரணங்களும் ஓர்

புனித ஜனனத்தை படைத்துவிட்டுதான் செல்கிறது.

மானிட பிறவியில் மட்டும் ஏன் மரணம்
ஓர் இறுதியாக மட்டுமே கணிக்கப்படுகிறது?

மானிட பிறவியிலும் மரணத்தில் ஓர்

ஜனனம் இருக்கின்றது,

அதுதான்...

பெண்மையின் மரணம்

தாய்மையின் ஜனனம்...

விழியே!

2009-09-28T14:46:00.014+05:30

ஒளியே!
நீ பிறந்தாய்
உலகம் விடிந்தது,

விழியே!
நீ பிறந்தாய்
என் உள்ளம் விடிந்தது.

மொழியே!
நீ பிறந்தாய்
உலகம் பேசியது,

விழியே!
நீ பிறந்தாய்
என் உள்ளம் பேசியது.

காதலே!
நீ பிறந்தாய்
கனிவு பிறந்தது,

விழியே!
நீ பிறந்தாய்
என்னுள் துணிவு பிறந்தது.

அன்பே!
நீ பிறந்தாய்
உலகம் பணிந்தது,

விழியே!
நீ பிறந்தாய்
என் உள்ளம் கனிந்தது.

ஜோதியே!
நீ பிறந்தாய்
பக்தி பிறந்தது,

விழியே!
நீ பிறந்தாய்
என்னுள்சக்தி பிறந்தது.

பெண்மையே!
நீ பிறந்தாய்
மென்மை பிறந்தது,

விழியே!
நீ பிறந்தாய்
என்னுள் மேன்மை பிறந்தது.

உயிரே!
நீ பிறந்தாய்
ஜனனம் பிறந்தது,

விழியே!
நீ பிறந்தாய்

என்னுள் நான் பிறந்துவிட்டேன்...

சில சிந்தனைகள்

2009-09-21T20:58:00.004+05:30

கைவண்டி இழுப்பவனின்

ஏழ்மையை சொல்லிடும்

எலும்பு வரிகள்..

ஆற்றங்கரையில் சாயம்

வெளுக்கின்றான்

சாதிகள் எனும் சாயத்தை

வெளுக்கமுடியாமல்..

பருந்தின் பார்வைக்கு

தவறிய குஞ்சுகள்

எலும்பு குவியலாய்

குப்பை மேட்டில்...

விடுதலை கிடைத்தவுடன்

தற்கொலையா!!

முறைத்துக்கொண்டும்

நுரைத்துக்கொண்டும் பொங்கிய

மதுபானம் விழப்போவது கழிவறைக்குள்

என்பதால்!!!

மறைந்துவிட்ட ஒளியினை

அழுதுகொண்டே தேடிய

மெழுகுவர்த்தி..

பேதையாய்

பிறந்ததால் என்னவோ!

மடந்தையாகியும்

மணமாகாத முதிர்கன்னி..

மழை பொழிகிறது

மாசுகளின் சாயம் துடைத்திட,

மதம் பொழிகிறது

மனிதர்களுக்கு சாயம் பூசிட...

நவீனமாக்கப்பட்ட நகரம்

2009-09-20T21:39:00.002+05:30

தொடர்வண்டி திட்டத்தால்
இடர்பட்ட மரங்கள்,
சிறகொடிந்தும் சிரிக்கின்றது
வண்ணம் மாற பூக்களுடன்.

ஆலயத்தை மிஞ்சும்
செல்லிடை கோபுரங்களின்
அலைவீச்சில் மரித்துவிட்ட
சிட்டுகளின் மெட்டுக்கள்.

வற்றிவிட்ட ஊரணியில் ஓர் அணியாய்
முளைத்துவிட்ட வீடுகள்.

ஆலைய நுரையீரல்களின்
புகை சுவாசத்தால்
மேக இமைகளில் அமில கண்ணீர்.

பிள்ளை வரம் வேண்டும் வீட்டில்
வாகன உறக்கத்திற்காக
வீழ்த்தப்பட்ட தென்னம்பிள்ளை.

தரை துளைப்பானின்
தொடர் தாக்குதலில்
எலும்புகள் உடைந்து பீரிட்ட
பூமித்தாயின் பச்சை ரத்தம்.

இயற்கையின் இசையெல்லாம்
ஒதுக்கப்பட்டு ஒடுக்கப்பட்டு
ஒலிக்கின்றது இன்றைய மங்கையின்
செவிகளை அடைத்துக்கொண்டு.

இயற்கையின் முன் நவீனமாக்கப்பட்ட
நரகமாய்...

சில வரிகள்..

2009-09-18T09:00:00.003+05:30

நிழலை கண்டு

நிஜமாய் உருகாதே!

காட்சி பொருளெல்லாம் காணலே!

புற தோற்றம் புதுமைதான் அதில்

அகம் உருகுவது அர்த்தமற்றது.

செவ்வண்ண அந்தியே!

ஏனிந்த கோபம்?

வானில் முகிலின்றி

மகிழ முடியவில்லையா?

இரவின் விதவைக்கு

குங்கும பொட்டாய் வாழ்வு

தந்த காலை கதிரே!

உன்னொளி பட்டுவிட்டால்

எல்லாம் மங்கலமே!

இரவுகள் என்றும் நிரந்திரமாவை,

உறவுகள் எல்லாம் சிறு வெளிச்சம்களே!

தன் பங்கிற்கு எரிந்து விட்டு செல்லும்.

உன்னுள் நீ ஒளிர்ந்தால் மட்டுமே

வாழ்வு வெளிச்சமாய் அமையும்..

பொய்

2009-09-16T07:38:00.003+05:30

உலகில் பொய் என்பது

எதுவும் இல்லை,

சொல்வது பொய் என்றால்

சொல்பவன் மெய்யே!

கானல் பொய் என்றால்

காண்பது மெய்யே!

வாழ்வது பொய் என்றால்

வாழ்க்கை மெய்யே!

வெளிச்சம் யார் மீது பட்டாலும்

நிழல் விழுவது போல்

உண்மையின் நிழல்தான் பொய்.

நிழலான பொய் எல்லாம்

நிஜமாய் நிலைப்பதில்லை,

சில உண்மைகளை மறைக்கும்

நிழல்கள்தான் அவை!

அஸ்தமனத்தில் உண்மை மட்டுமே

விளக்கேற்றும்...

ஒளிர்ந்திடு!

2009-09-14T10:02:00.002+05:30

உடலென்ற அகழுக்கு

உள்ளமென்ற திரியிட்டு

உணர்வென்ற எண்ணையிட்டு

வாழ்வென்ற ஜோதி ஏற்றி

அன்பென்ற ஒளியாய்

ஒளிர்ந்திடு...

பிம்பங்கள்

2009-09-14T09:52:00.002+05:30

உருவத்தின் பிம்பம் நிழல்கள்

உள்ளத்தின் பிம்பம் நினைவுகள்

உருவ பிம்பங்கள் மறைந்துவிடும்

உள்ளத்தின் பிம்பங்கள் மறைவதில்லை..

போராட்டம்

2009-09-13T00:34:00.002+05:30

போராட்டங்கள், எதிர்நீச்சல்கள் என

ஆயிரம் மூழ்கினேன், முங்கினேன்

சுயநலம் எனும் சேற்றில் விழுந்திருந்தால் கூட

சிறு மண்ணாவது மிஞ்சியிருக்கும்,

எஞ்சியிருப்பது உயிர் மட்டும்தான்

மண்ணாகிபோவதற்கு!!

உறவை துறவு கொண்டால்தான்

வரவு கூட உறவு கொள்ளும்...

பெண்

2009-09-11T00:59:00.004+05:30

இருண்ட வானில்
இரட்டை விண்மீனாய் படத்த விழிகள்,
கனத்த மேகமாய் இமைகளின சாமரம்.
குளிர்ந்த காற்றினையும் அனலாக்கிய சுவாசம்,
நிலைப்படுத்த முயன்றும்
தோற்றுப்போன மனதாய் பிசைந்தது.
மின்னல் கீற்றாய் சிதறிய பிளவில்,
மீண்டும் பிறப்பதன் முன்னோட்டமாய் ரணம்.
விழிகளை சொருகி அணைத்த
இமைகளின் கால்களில் உதிர்ந்த
இரு துளிகளில் வடிந்திடும் வலிகள்...

உழைத்து உண்

2009-09-08T00:04:00.003+05:30

சுற்றும் உலகில் சற்றும் எதிர்பாரா

சம்பவங்கள் எத்தனை! எத்தனை

வியர்வை சிந்தி உழைத்தவர்கள் செல்வதை

வித்தாய் சிந்தி களைத்தவர்கள் எத்தனை!

ஓவியம் காணா மாளிகைகளையும்

காவியம் காணா கோபுரங்களையும்

மல்லிகை மஞ்சத்தில் தொலைத்தவர்கள் எத்தனை!

குருதி அறுதியிட்டு கூறமுடியாத வாரிசுயின்றி

மாறிய செல்வங்கள் எத்தனை!

நம்பிக்கையின் புள்ளிகளுக்கு சூழ்நிலை

கோலமிட்டு ஏமாறிய செல்வங்கள் எத்தனை!

புத்தியின் கூர்மையால் வந்த செல்வங்கள் எல்லாம்

கத்தியின் கூர்மைக்கு பலி ஆனவை எத்தனை!

உலகில் உழைப்பவர்கள் சிலரே,

வாலிபம் சேர்த்ததை

வயோதிகம் தின்பதில்லை.

உலக இளைஞர்களே!

நீங்கள் உண்ணும் உணவில்

உழைப்பின் அளவு

உப்பின் அளவாது இருக்கட்டும்.

உழைத்து உண்.

மற்றவர்களை இழைத்து உண்ணாதே!

கடலளவு உழைப்பவர்கள் முன்

நீ உன் உடலளவு உழைத்திடு.

அதில் திளைத்திடு ஆனந்தமாய்...

விழிகள்

2009-09-07T23:44:00.002+05:30

இமைக்குள் உறங்குவதும் நீதான்,

இமயமாய் துன்பம் வரும்போது

இமைக்குள் உருகுவதும் நீதான்..

பெண்மையின் உள்ளம்

2009-09-07T09:04:00.003+05:30

பெண்மையின் உள்ளம்

கடலைவிட ஆழமானது

என்பதைவிட

கற்ப கிரகத்தைவிட புனிதமானது

என்பதுதான் உண்மை.

அந்த புனிதத்தை

உணர்ந்துவிட்டால்

உன்னில் பாதி பெண்மை

என்பதை விடுத்து

பெண்மையின் மீதிதான் நீ

என்பதை உணர்ந்திடுவாய்...

பெண்மை

2009-09-05T22:37:00.003+05:30

விழிதனில் மொழி படைத்து,

மொழிதனில் காதல் படைத்து,

காதலில் காவியம் படைத்து,

இவ்வுலகை சிருஸ்டித்து நம்

உணர்வை சிருஸ்டித்து,

மழலையில் உறங்கசெய்து,

மாலையில் மயங்கசெய்து,

பாறை நெஞ்சங்களிலும்

பாசம் பூக்க செய்து,

உன் வாழ்வினில் நகமும் அகமுமாய்

வாழ்ந்திடும் பெண்மை எனும்

பிரம்மம் போற்றிடு...

துளிகளே!

2009-09-04T21:24:00.004+05:30

விழிகளை பிரிந்த துளிகளே!

உன் வலிகளை புரிந்த

வார்த்தைகள் இவை.

பார்வை மட்டுமே உலகம் என்ற விழிகளுக்கு

பாதை காட்டிட பிறந்தாயோ!

இதயத்தின் ஆனந்தத்திலும் பொங்கினாய்,

ஆழத்திலும் பொங்கினாய்.

உப்பு கடலில் முத்தை படைத்தவன்தான்,

உள்ள கடலில் உன்னையும் படைத்தான்.

இதயம் வார்த்தைகளற்று போகும்போது

இதழ்களுக்காக பேச பிறந்தாயோ!

அகத்தின் பக்கத்தில்

அன்பின் சுவடுகள் கண்டவர்களுக்கு,

முகத்தின் பக்கத்தில்

உப்புசுவடுகள் நீ.

விண்ணை பிரியும் மழை நீர்தான்

மண்ணை புரியும்,

உன்னை பிரியும் கண்ணீர்தான்

என்னை புரியும்.

2009-09-02T14:54:00.002+05:30

புருவ வில் வளைத்து,
பார்வை அம்புகள் தொடுக்கும் விழிகளை,
எத்தனை முறை அடித்தாலும் கேட்பதில்லையே!

இமைகள்....

இதயம்

2009-09-02T00:19:00.002+05:30

நீ

வெளிச்சமாக வாழத்தான்

இதயம் கூட

இருளில் துடிக்கின்றது.

2009-09-01T07:54:00.002+05:30

எல்லோருக்கும்

உலகம் ஒன்றுதான்,

எனக்கு மட்டும் அது

இரண்டாய் தெரிகின்றது!

உன் விழிகளில்....

பூ

2009-09-01T07:43:00.002+05:30

பெண்மை என்னும் "பூ

இன்னும் பூத்துகொண்டு

இருப்பதால்தான்,

உலகம் அன்பின் வாசத்தில்

வாழ்ந்துகொண்டு இருக்கின்றது.

உலகம்

2009-09-01T00:16:00.002+05:30

சுருக்கமாக சொன்னால்

உலகம் விரிவானது,

விரிவாக சொன்னால்

உலகத்தின் சுருக்கங்கள்தான் அதிகம்.

அன்பு

2009-08-31T23:59:00.002+05:30

அன்பை எடுப்பவன்

ஆயுதத்தைவிட

கூர்மையானவன்

ஆயுதத்தை எடுப்பவன்

அன்பினால்

கூர்மை ஆக்கப்படாதவன்.

உன்

2009-08-31T23:58:00.002+05:30

உன் வலிகளை செதுக்கிடும்

உளிகள்தான் என் வார்த்தைகள்..

மனம்

2009-08-28T23:15:00.003+05:30

சில சம்பவங்கள்
மனதை ஆள நினைக்கும்,
சில சம்பவங்களில் இருந்து
மனம் மீள நினைக்கும்.
சம்பவங்கள் எல்லாம்
சந்தர்பத்தின் தூண்டில்களே!
அதில் புழுவாய் துடிப்பது
மனம் மட்டுமே!..

உனக்காக

2009-08-25T09:46:00.002+05:30

உனக்காக நீ வாழ வேண்டாம்,
வாழ நினை அது போதும்
அதுதான் உன் உறவு முடிச்சுகளை
வலிக்காமல் அவிழ்க்க உதவும்.

எதிர்காலம்

2009-08-25T09:21:00.003+05:30

எதிர்காலம் என்பது
விளக்கின் வெளிச்சம்
கண்களுக்கு தெரியும்வரைதான்.
மேலும் தெரிய முடியுமென்றால்
அது உன் அகத்தின் விளக்கால்
இந்த உலகத்தின் பொருளை உணர்ந்து
பார்த்தால் மட்டுமே தெரியமுடியும்.

இயற்கை

2009-08-22T14:47:00.003+05:30

மழையில் நனைந்த மழலைகள் போல
காலை சோலை...
ஆதவ ஒளி தலை துவட்டியது
மஞ்சலாடையில்
பூமித்தாயின் பச்சையாடையில்
வண்ண கோலங்களாய் சோலைப்பூக்கள்..
தென்றல் நாணலை வருடிட
கழுத்துவரை ஸ்நானம் செய்திடும் நெல்மணிகள்..
சிட்டுக்கள் மெட்டு பாடிட,
குயிலினம் குரல்வளம் காட்டியது.
மயிலினம் தோகை விரித்திட,
தென்றல் வேகம் காட்டிட,
தென்னை தன்னை மறந்து
விண்ணை அளந்து,
மேக கருக்கலில் சாரல் தூவியது,
இயற்கையின் இளமை காத்திட...

வானம்

2009-08-22T14:09:00.003+05:30

நீலத்தில் மிஞ்சிய மேகங்கள் போய்
மேகத்தில் மிஞ்சிய நீலமாய் வானம் இன்று.
ஆதவ பார்வையில் வியர்வை முத்துக்கள்,
ஆடிடும் தென்றலில் சாரல் முத்துக்கள்.
நிலம் பெரும் துளிகளெல்லாம்
வளம் பெரும் வாழ்விற்கே!

அந்தியே!

2009-08-21T10:55:00.003+05:30

நிழலை நீளமாக்கி
நினைவுகளை ஆழமாக்கி
ஒளிதனில் ஓவியம் படைத்துவிட்டு
உறங்க செல்லும் அந்தியே!
உன் மனதின் வெளிச்சத்தை மட்டும்
உறங்கச் செய்து விடாதே!

வெற்றியை..

2009-08-21T10:53:00.002+05:30

வெற்றியை விரல்நுனியில்
தாங்குபவனைவிட
தோல்வியை இதயத்தில்
தாங்குபவனே மேலானவன்.

ஆழமாக..

2009-08-19T08:55:00.004+05:30

ஆழமாக சிந்தித்தால்தான்
உயரமாக செல்லமுடியும்.
அன்பாக இருந்தால்தான்
அதை வெளிப்படுத்தமுடியும்.
நான் என்ற சொல்லில்தான்
தான் என்ற கர்வம் உள்ளது.
நாளை என்பது இறப்பதில்லை
இன்று அது பிறப்பதில்லை.
பொய்யான காட்சிகளைகூட
உண்மையாக படம் பிடிப்பவைதான் கண்கள்.
நான் அன்பாய் பார்ப்பதால்தான்
நீ அழகாய் இருக்கின்றாய்....

பெண்மையின் ஒளி!

2009-08-19T08:46:00.004+05:30

ஆதவ வெளிச்சம் புற கண்களுக்கு
மட்டுமே பரிச்சயம்...
அன்பின் வெளிச்சத்தை
அக கண்களால் ஈந்து
ஆண்மையின் வேகத்தை
அன்பின் விவேகமாக்கி
வாழ வைத்திடும்
பெண்மையின் ஒளி மட்டுமே!
இவ்வுலகை நிரந்திர ஒளியில்
வாழ வைத்திடும் என்றென்றும்..

கண்ணீராக

2009-08-17T22:23:00.003+05:30

நான் உன்..
கண்ணீராக இருந்தால்!
உன் கன்னத்தில் விழுந்து
இதழில் மடிவேன்...!!

வண்ணத்துப்பூச்சியாய்..

2009-08-17T22:13:00.003+05:30

சிற்றின்ப தீயில் வெந்திடும்
விட்டில் பூச்சியாய் இருப்பதைவிட
பேரின்ப வானில் சிறகடிக்கும்
வண்ணத்துப்பூச்சியாய் இருந்துவிடு..

என்னுள்..

2009-08-17T22:08:00.002+05:30

என்னுள் சிந்திக்க
தெரிந்த எனக்கு
எனக்காக சிந்திக்க
தெரியவில்லை..!!

மிருகம்

2009-08-17T22:04:00.002+05:30

தவறுக்கு அஞ்சுபவன்
மனிதன்..
தவறையே அஞ்சும்படி
செய்பவன் மிருகம்..

மௌனமாய்

2009-08-17T22:00:00.002+05:30

தனிமையாய்...
இருப்பதைவிட
மௌனமாய்...
இருப்பதே மேல்!!

பாவையாய்..

2009-08-14T22:49:00.004+05:30

உன் கண்களில்
மணியாய் நானிருந்து....
உன் கண்மணியாய்
என்றும் நானிருப்பேன்,
பார்வையோடு சேர்ந்த
பாவையாய்....

விழிகளை பார்த்து

2009-08-14T09:18:00.005+05:30

விழிகளை பார்த்து
இமைகள் சொன்னது....

"நான் என்றும் உன்னை அரவணைகின்றேன்
உன் பார்வை மட்டும் எங்கேயோ!"

விழிகள் சொன்னது...

என்னை பார்க்க செய்பவனும் நீதான்,
உறங்க செய்பவனும் நீதான்,
என் மீது தூசு படாமல் காப்பவனும் நீதான்,

உன் அன்பை எண்ணி
உனக்குள் உருளுவதும் உருகுவதும்
இந்த விழிகள் மட்டுமே.....

இமைகள் இமைக்க மறுத்தன....

நம்பிக்கை

2009-08-13T09:43:00.002+05:30

முட்களின் பாதையில்
கண்ணாடி சிதறல்கள்!!
சிதறவில்லை மனம்,
முட்களில் ரோஜா தெரிகின்றது,
கண்ணாடியில் எதிர்காலம்
தெரிகின்றது...

துடிப்புகள்!

2009-08-12T19:25:00.002+05:30

ஒரு முறை இணைந்தது இதயம்
பல முறை இணைந்தது துடிப்பு
துடிப்புகள் இல்லாமல்
இதயம் இல்லை....

பிரிவே!

2009-08-12T19:19:00.003+05:30

உன் கோபம் கானல் என்று
எனக்கு தெரியும்,
என் மனம் நாணல் என்று
உனக்கு தெரியும்,
கல் மனம் கொண்ட பிரிவே!
பிரிக்க நினைத்தால்
நீயல்லவா உடைந்து போவாய்...

உன் கண்களை

2009-08-12T19:04:00.003+05:30

உன் கண்களை மூடி பார்
அதில் கனவுகளாய் நானிருப்பேன்
உன் சிந்தனைகளை தேடி பார்
அதில் நினைவுகளாய் நானிருப்பேன்
உன் இதயத்தை திறந்து பார்
அதில் உயிராய் நானிருப்பேன்
இதில் நீ என்பது எதுவுமில்லை
உன்னுள் முழுமையாய் நானிருக்கின்றேன்
உன்னுள் இருக்கும் என்னை
சந்தோசமாய் வைத்திரு என்றும்...

வானம் மட்டும்

2009-08-12T17:40:00.002+05:30

வானம் மட்டும் பொழியவில்லை
உன் விழிகளும்தான்
சிறிய ஊடல்கள் எல்லாம்
பெரிய இடைவெளியில் பரந்திட்டாலும்
இனி அந்த சண்டைகளையும் உன் கோபங்களையும்
நினைவுகளாக்கி பயணிக்கின்றேன்....

புரியும்

2009-08-11T09:01:00.002+05:30

இடக்கண் துடிப்பதை
வலக்கண் அறியும்
என் இதயம் துடிப்பதை
உன் நட்பு மட்டும் புரியும்.

நீர்

2009-08-11T08:59:00.001+05:30

நீர் தெளிந்ததால்
முகம் தெரிகிறது
நீ தெரிந்ததால் என்
அகம் தெரிகிறது.

மண்ணை

2009-08-11T08:55:00.003+05:30

மண்ணை
சிலையாக்கியது சிற்பி
என் மனதை
கலையாக்கியது
உன் நட்பு....

என்னுள்

2009-08-11T08:53:00.002+05:30

என்னுள்
உறைந்துவிட்ட
கவிதைகளை
உருகசெய்துவிட்டது
உன் நட்பு...

மனதின்

2009-08-10T23:50:00.003+05:30

மனதின் கடிவாளத்தை
புத்தியின் கைகளில் வைத்துக்கொள்
ஏனெனில்
புத்திக்கு தோல்வியை தெரியும்
மனதிற்கு தெரியாது துவண்டுவிடும்.

வாழ்க்கை

2009-08-10T23:36:00.003+05:30

உதயங்கள் சுடுவதில்லை
அஸ்தமனங்கள் அழிவதில்லை
இதில் வரும் வாழ்வு மட்டும் புரிவதில்லை
புதினங்கள் முடிச்சு இடும்
அதை உணர்ந்து அவிழ்பதுதான் வாழ்க்கை.

பாரதியார்

2009-08-10T23:24:00.002+05:30

தமிழ் தேரின் சாரதி,
விடுதலை காண்டீபத்தின்
தமிழ் பிரம்மாஸ்திரம்.
தான் வளர்த்த மீசையினை
தமிழுக்கும் வளர்த்தவன்.
தலைப்பாகை கட்டி
தமிழ் பாவிற்கும், பாவைக்கும்
வீரம் வளர்த்த புரட்சி கவி....

பிம்பம்

2009-08-10T23:21:00.001+05:30

உருவத்தின் பிம்பம் நிழல்கள்
உள்ளத்தின் பிம்பம் நினைவுகள்
உருவ பிம்பங்கள் மறைந்துவிடும்
உள்ளத்தின் பிம்பங்கள் மறைவதில்லை.

பிரிந்து

2009-08-08T23:34:00.001+05:30

கடலை பிரிந்த அலைகள்,
மடலை பிரிந்த வரிகள்,
உடலை பிரிந்த உயிர்,
நிழலை பிரிந்த நிஜம்,
இருக்குமேயானால்!!
நானும் இருப்பேன்!
உன் நட்பை பிரிந்து..

விழித்திருக்கும்

2009-08-08T23:30:00.000+05:30

புத்தி உறங்கி விழிக்கும்
மனம் உறக்கத்திலும்
விழித்திருக்கும்...

உறவாடும்

2009-08-08T23:27:00.001+05:30

சோகமும் சுகமும் உன்னை
ஒட்டி உறவாடும்
கோபமும் தாபமும் உன்னை
வெட்டி உறவாடும்.

நிரந்திரம்

2009-08-08T23:23:00.001+05:30

எதுவும் நிரந்திரமில்லாமல்
போவது ஓர்
நிரந்திரமே!

நட்பு

2009-08-08T23:14:00.002+05:30

நட்பு என்பது
நம் வாழ்க்கை புத்தகத்தில்
இடையில் வந்த முதல் அத்தியாயம்
நம் வாழ்வின் அத்தியாயங்கள்
முடிந்தாலும்,
நட்பின் அத்தியாயங்கள்
என்றும் முடிவதில்லை.

தொழிலாளி

2009-08-08T23:12:00.001+05:30

ஒரு தொழிலாளியின் வியர்வை
முதலாளியின் முதலீடுக்கு சமம்
தொழிலாளியின் கண்ணீர்
முதலாளியின் ரத்தத்திற்கு சமம்.

என்னுள்

2009-08-08T00:12:00.002+05:30

என்னுள்...
அன்பை தேடினால்
அன்பு மிஞ்சும்,
குற்றம் தேடினால்
குற்றம் மிஞ்சும்.
அன்பு என் ஆழ்மனது
குற்றம் என் நொடிபொழுது.

சலசலப்பிலும்!

2009-08-07T23:52:00.002+05:30

மாலை நேரம்,
ஆலமரத்தில் ஆயிரம் மைனாக்கள்
கூடின குலவின...
மனிதன் சளித்துகொண்டான்
ஒரே சப்தமென்று.
சிறிது நேரத்தில் ஒரே நிசப்தம், அமைதி..
மைனாக்கள் உறங்கின
மனிதனின் சலசலப்பிலும்....

இரவுகள்

2009-08-07T23:44:00.002+05:30

இரவுகள் என்றும் இனிமையானது,
பூக்கள் கூட தன் கடைசி சுவாசத்தை
விசுவாசமாய் காட்டும் நேரமிது,
இனிய இரவு என்றும் அமைதிக்கு உறவு.

சாரல்

2009-08-06T23:38:00.002+05:30

நீல வானத்தை வெண்மை
போர்வையாய் மேகம் மறைத்தது,
சாரல் தூவிட....
அணிந்துவிட்ட ஆடையோ!
மழையை அணியவா?
நனையவா? என விசும்பிட
நனைந்துவிட்டேன் மனதினில்..

உன்

2009-08-06T23:31:00.001+05:30

கைகளுக்கு எட்டாத விசயங்களை
புத்தியால்தான்பெற முடியும்.
புத்திக்கு எட்டாத விசயங்களை
மனதால் மட்டுமே உணரமுடியும்.

விடியல்

2009-08-06T23:25:00.001+05:30

மாற்றம் மிகுந்த உலகில்
ஏமாற்றம் இல்லாத விடியல்...

வெற்றியை

2009-08-06T23:22:00.001+05:30

வெற்றியை விரல் நுனியில்
தாங்குபவனைவிட,
தோல்வியை இதயத்தில்
தாங்குபவனே மேலானவன்.